“Ölkəmizi tanıyaq” II tur-aksiya çərçivəsində Sabunçu Rayon İcra Hakimiyyəti tərəfindən Naxçıvan məktəbliləri mükafatlandırıldı
26 mart 2016-cı il tarixində Sabunçu Rayon İcra Hakimiyyətinin təşkilatçılığı ilə “Ölkəmizi tanıyaq” II tur-aksiya çərçivəsində Bakıya gələn Naxçıvan məktəblilərinin yerləşdikləri “Qafqaz Baku Sport” otelinde görüş keçirildi.
Görüşdə II tur-aksiya iştirakçıları olan Naxçıvan məktəblilərinin Bakı Olimpiya Stadionuna ekskursiyası zamanı bədii-qiraət müsabiqəsində fərqlənən Şahbuz şəhər 1 nömrəli məktəbin XI sinif şagirdi Sultanlı Səkinə Ramiz qızı, Ordubad rayon, Əmdəmic kənd məktəbinin XI sinif şagirdi Səfərli Xanım Əyyar qızı və Kəngərli rayon, Böyükdüz kənd məktəbinin XI sinif şagirdi İsmayılova Aytac Vahid qızına Sabunçu Rayon İcra Hakimiyyəti tərəfindən vəd olunan hədiyyələr təqdim olundu.
Sabunçu Rayon İcra Hakimiyyətinin başçısının müavini Arzu Məmmədova çıxış edərək, Prezident İlham Əliyevin təşəbbüsü ilə reallaşan və hər kəs tərəfindən bəyənilən “Ölkəmizi tanıyaq” layihəsi gənc və yeniyetmələrin vətənpərvərlik tərbiyəsinin daha da yüksəldilməsində, dünyagörüşünün formalaşmasında mühüm rol oynadığını vurğuladı. Şagirdlər də yaradılmış bu şəraitə görə cənab Prezident İlham Əliyevə öz minnətdarlıqlarını bildirdilər.
Görüş layihə iştirakçıları ilə birgə çay süfrəsi arxasında musiqili proqramla davam etdi.
