Sabunçu rayonunda YAP-ın 30 illik yubileyinə həsr olunmuş ümumrespublika şahmat turnirinin final mərhələsi keçirildi
12 noyabr 2022 | 17:38
12.11.2022-ci il tarixdə Sabunçu rayonunda yerləşən Bakı Gənclər Mərkəzində Yeni Azərbaycan Partiyasının (YAP) 30 illik yubileyinə həsr olunmuş ümumrespublika şahmat turnirinin final mərhələsi keçirildi.
İlk olaraq tədbir iştirakçıları Ümummilli lider Heydər Əliyevin abidəsi önünə gül dəstələri düzərək əziz xatirəsini ehtiramla yad etdilər və Bakı Gənclər Mərkəzində Ulu Öndərin həyat və siyasi fəaliyyətini əks etdirən muzeylə tanış oldular.
YAP Gənclər Birliyinin sədri Bəxtiyar İslamov hesabat məruzəsi təqdim edərək bildirdi ki, oktyabrın 29-da start götürən turnirdə ümumilikdə 80-i kişi və 80-i qadın olmaqla 160 nəfər gənc iştirak edib. Turnirin qrup mərhələsi üzrə görüşlər Bakı, Xaçmaz, İmişli, Ucar, Gəncə, Yevlax, İsmayıllı, Cəlilabad və Şirvanda, “play-off” mərhələsi üzrə Ucar şəhərində keçirilib, final yarışları isə Bakı şəhərində təşkil olunub.
Bakı Gənclər Mərkəzində keçirilən final oyunlarında I yeri qadınlar üzrə Türkan Abdullayeva (Gəncə), kişilər üzrə isə Şahin Hacıyev (Göygöl) qazanıb. II yerin qalibləri qadınlar üzrə Lalə Rzabəyli (Sumqayıt), kişilər üzrə Həzrət Orucov (Quba) olub. Xədicə Xəlilova (Zaqatala) və Rüfət Hümbətov (Saatlı) isə müvafiq olaraq III yeri əldə ediblər.
Tədbirdə Sabunçu Rayon İcra Hakimiyyətinin başçısı Adil Vəliyev tərəfindən oyunları idarə edən hakimlərə xatirə hədiyyələri təqdim olundu.
Qalib olan iştirakçılar diplomlar, medallar və xatirə hədiyyələri ilə mükafatlandırıldılar. III yerin qaliblərini Ailə, Qadın və Uşaq Problemləri üzrə Dövlət Komitəsi sədrinin müavini, YAP İdarə Heyətinin üzvü Aynur Sofiyeva, II yerin qaliblərini YAP Veteranlar Şurasının sədri Arif Rəhimzadə, I yerin qaliblərini isə YAP Sədrinin müavini - Mərkəzi Aparatın rəhbəri Tahir Budaqov təltif etdi.
Turnirin bağlanış mərasimində çıxış edən YAP Sədrinin müavini-Mərkəzi Aparatın rəhbəri Tahir Budaqov 12 Noyabr – Konstitusiya Günü münasibətilə tədbir iştirakçılarını təbrik etdi. O bildirdi ki, 1995-ci ildə Ulu öndər Heydər Əliyevin rəhbərliyi ilə hazırlanmış və ümumxalq səsverməsi nəticəsində qəbul edilmiş Azərbaycan Respublikasının Konstitusiyası hüquqi və demokratik dövlət quruculuğunun əsasını təşkil edib.
Bir neçə gün öncə Zəfər bayramının və Dövlət Bayrağı Gününün qeyd olunduğunu xatırladan Tahir Budaqov vurğuladı ki, Azərbaycan Respublikasının Prezidenti, Müzəffər Ali Baş Komandanımız İlham Əliyevin rəhbərliyi ilə möhtəşəm Zəfərin qazanılmasında, ölkəmizin ərazi bütövlüyünün və xalqımızın milli qürurunun bərpa olunmasında Azərbaycan gənclərinin müstəsna rolu olub.
YAP Sədrinin müavini qeyd etdi ki, Ulu öndər Heydər Əliyev tərəfindən əsası qoyulan və Prezident İlham Əliyevin uğurla davam etdirdiyi dövlət gənclər siyasəti nəticəsində vətənpərvər və intellektual gənc nəsil formalaşıb. Bu reallıq Azərbaycanın möhtəşəm Qələbəsi ilə başa çatan 44 günlük Vətən müharibəsində də özünü təsdiqlədi.
Tahir Budaqov milli ruhda yetişmiş, sağlam əqidəli gənclərin Azərbaycanı beynəlxalq platformalarda da layiqincə təmsil etdiklərini diqqətə çatdırdı. O vurğuladı ki, Azərbaycan Prezidenti, Yeni Azərbaycan Partiyasının Sədri İlham Əliyevin ətrafında sıx birləşən gənclərimiz müstəqil dövlətimizin parlaq gələcəyinin qurulmasında fəal iştirak edirlər: “İnanıram ki, gənclərimiz ölkəmizin inkişafı və üçrəngli bayrağımızın daim zirvələrdə dalğalanması üçün bütün imkanlarını səfərbər edəcəklər”.
Tahir Budaqov turnir iştirakçılarını təbrik edərək onlara gələcək fəaliyyətlərində uğurlar arzuladı.
Yeni Azərbaycan Partiyasının 30 illik yubileyinə həsr olunmuş şahmat üzrə turnir Azərbaycan Respublikasının Dövlət Himninin səsləndirilməsi ilə başa çatdı.
Keçidlər
