Sabunçu rayonunda “Tarixi Zəfərimiz Heydər Əliyev siyasətinin təntənəsidir” adlı tədbir keçirildi

08 noyabr 2023 | 10:20

06.11.2023-cü il tarixdə Sabunçu Rayon İcra Hakimiyyəti, Azərbaycan Respublikası Müdafiə Nazirliyinin birgə təşkilatçılığı və Heydər Əliyev adına Hərbi İnstitutunun Orkestrinin iştirakı ilə "8 noyabr-Zəfər Günü" ilə əlaqədar “Tarixi Zəfərimiz Heydər Əliyev siyasətinin təntənəsidir” adlı konsert proqramı keçirildi.

Tədbirdə Sabunçu Rayon İcra Hakimiyyətinin başçısı Adil Vəliyev, YAP Sabunçu rayon təşkilatının sədri Araz Xudadanov, Azərbaycan Respublikası Müdafiə Nazirliyinin Şəhid ailələri, qadınlar və hərbi qulluqçuların ailələri ilə iş şöbəsinin rəisi Zümrüd Səmədova, Vətən müharibəsi qazisi, Müdafiə Nazirliyinin bölmə rəisinin müavini, polkovnik-leytenant Rüfət Məmmədov, rayon hüquq-mühafizə orqanlarının rəhbərləri, Rayon İcra Hakimiyyəti başçısının müavinləri, Rayon İcra Hakimiyyəti başçısı aparatının məsul əməkdaşları, Rayon İcra Hakimiyyəti başçısının qəsəbə inzibati ərazi dairələri üzrə nümayəndələri, bələdiyyə sədrləri, Vətən müharibəsi iştirakçıları, qazilər, şəhid ailələri, rayon ərazisində fəaliyyət göstərən təhsil, səhiyyə, mədəniyyət, idman, gənclər və sosial xidmət müəssisələrinin nümayəndələri, qeyri-hökumət təşkilatları və rayon ictimaiyyətinin digər nümayəndələri iştirak edirdilər.

İlk olaraq tədbir iştirakçıları Ümummilli lider Heydər Əliyevin abidəsi önünə gül dəstələri düzərək əziz xatirəsini ehtiramla yad etdilər. Azərbaycan Respublikasının Dövlət Himni səsləndirildikdən sonra tədbir iştirakçıları ölkəmizin azadlığı və ərazi bütövlüyü uğrunda qəhrəmancasına şəhid olan vətən övladlarının əziz xatirəsini bir dəqiqəlik sükutla yad etdilər.

Tədbiri giriş sözü ilə açan Sabunçu Rayon İcra Hakimiyyətinin başçısı Adil Vəliyev tədbir iştirakçılarını “8 noyabr – Zəfər Günü” münasibətilə təbrik edərək bildirdi ki, Ali Baş Komandan cənab İlham Əliyevin rəhbərliyi ilə sentyabrın 27-dən başlanan Vətən müharibəsi şanlı qələbə ilə sona çatdı və 44 gün davam edən hərbi əməliyyatlar çərçivəsində Azərbaycan Ordusu işğalçı Ermənistanın 30 il ərzində qurduğu silahlı qüvvələrini darmadağın edərək böyük Zəfərə imza atdı. A.Vəliyev vurğuladı ki, Azərbaycan xalqı öz lideri-Azərbaycan Respublikasının Prezidenti, Müzəffər Ali Baş Komandan İlham Əliyevin ətrafında sıx birləşməklə bütün dünyaya öz gücünü, qətiyyətini, mətinliyini, mübarizliyini və ən əsası birliyini nümayiş etdirdi. 44 günlük Vətən müharibəsi nəticəsində şanlı bayrağımızın işğaldan azad edilmiş ərazilərdə dalğalanması tariximizin ən şanlı, şərəfli və parlaq səhifəsinə çevrildi. Qeyd olundu ki, Ümummilli lider Heydər Əliyevin parlaq, uğurlu və uzaqgörən siyasətinin bəhrəsi olan tarixi zəfərimiz Azərbaycan xalqının iftixar və qürur mənbəyidir.

Sonra tədbir Heydər Əliyev adına Hərbi İnstitutunun Orkestrinin ifasında möhtəşəm konsert proqramı ilə davam etdi.